Sa nahihiling ko sa ngunyan, maogmahon na naman ang gabos nin huli ta eleksyon na naman. An mga buratseto nagbabaraysay-basay na naman sa mga gilid nin tinampo o naka-istambay sa waiting shed tanganing mag-abang nin mga kandidato na boot magpasikat sainda.
Segurado, kadakol na naman burat atyan na banggi.
Laen pa, an mga barangay dapat kuta na non-partisan, kaya dae kaipuhan si Mayor o siisay man na darakulang pulitiko na mag-endorso nin kandidato sa barangay. Alagad, may mga bareta na sikreto daa na nagtatabang an mga mayor asin kagawad sa banwaan sa lokal na eleksyon na ini kan barangay.
Asus, gabos na sana mga parasalambaw kan ley nyato. Sa parte man kan lokal na Comelec, mayo sindang kapasidad na bantayan an siring kaining mga bayolasyon nin huli sa kakulangan nin mga tawo apwera lang kun tabangan sinda kan lokal na pulis na iyo an pangenot na deputado kan Comelec tanganing implementaron an ley. Alagad, dae man nganing maginibo nin huli ta kontrolado man sinda kan lokal na ehekutibo para magsunod sa mandasyon kan Comelec.
Sa ngunyan, an obserbasyon ko---karanapan na naman kan mga botante. An mga kandidato pasikretong kinokontak an saindang mga tawo at mga ka-alyado tanganing bilangon kun pira man nanggad an sainda asin pira sa kalaban. Kun may daogan, nag-aandam na an manok ni mayor ni kantidad tanganing barakalon an boto nin nagkapira tanganing maitungkos sa lamang sa kandidato ninda. Haros siring kaini an senaryo na manunumpungan kan mga tawo sa barangay. Nag-eerestoryahan na kun gurano an magagastos kan grupo ni mayor asin kan grupo nin kalaban. Hiringhingan sana an barakalan na garo baga yaon sa merkado an epektos na kaipuhang bakalon.
Iyo po, siring na kaini ngunyan an daralagan sa parte nin barangay. An pagbakal nin boto sa mga botante saro na sanang normal na transaksyon nin kandidato asin botante. Si halangkaw magbayad, iyo an gana.
Kaya daw ko kaiyan. Bayad na palan an mga botante, tapos an huri mareklamo na mayong naginibohan an saindang mga opisyal apisar na igwa ining naginibohan sainda---binakal na an saindang mga boto.
Kung siring na kaini an kamugtakan, ano pa daw sa itaas? Mala?
